KASALANAN NI JEM-JEM

Sumakay kami ng LRT kahapon upang madaling makarating sa Manila Science. Dahil  kasama ko si Jem ay nagamit niya ang kaniyang pribilehiyo sa PWD Card. Diskwento sa pamasahe at makakapwesto sa espesyal na pugon sa naturang sasakyan.

Dahil sa maraming pasahero, ikatlong tren na kami nakasakay at medyo may kaluwagan pa ang bagon bagamat nakatayo na kami. Ipinuwesto si Jem ng isang Senior Citizen sa may hawakan sa kaniyang harapan para hindi siya matumba at maging komportable siya. Ilang saglit pa, biglang may nagwalang matandang babae at inaaway ang matandang kaniyang katalikuran. “Nakadikit kasi yang pwet mo sa akin, hirap na hirap na ako rito.” Sagot naman ng lalaki “Naku dapat nag-taxi kayo at ganito talaga rito.” Lalong nagalit ang matanda at nagpatuloy sa kanyang pagsasalita ng di maganda hanggang sa makapagbitiw ng bulgar na pananalita. “Gago ka pala eh!”

Nananahimik ang matanda sa sumunod na pangyayari, pinagtulungan siya ng mga Senior Citizen na nasa loob ng bagon at pinagsabihan sa kaniyang sinabi. “Ilan taon na ba kayo Nay, nakita naman ninyo na ganito talaga sa LRT.” Dagsag pa ng isa “Matandang dalaga yata yan eh.” Pagsita pa ng isang matanda “Matanda na po tayong lahat dito at di tamang nagmumura ka ng ganyan.”

Humupa na ang tensyon at nakita kong nangingilid ang luha sa matanda. Samantalang ang kaninang mga nagtutulong ay nagpunta ang usapan sa kanilang mga apo at nagkatanungan ng kanilang mga edad. Nagbahaginan ng mga karananasan at pribilehiyo ng pagkakaroon nila ng Senior Citizen Card.

Napansin ko rin ang ilang nakaupo sa bagon, karamihan sa kanila di naman matatanda at may bitbit lamang na mga batang below 4 feet. Naaasar pa ako sa katapat kong mag-asawa na sarap na sarap sa kanilang upuan,sana isa na lang sa kanila ang umupo at ibinigay sa matandang nakatayo ang isa. Kanina habang iniaabangan namin ang tren, may pamilyang sasakay sana sa  espesyal na bagon. Buti na lang sinita sila ng guwardiya at kailangang isa lang ang sumama sa kanilang Lola kung nagkataon mananakawan na naman ng pribilehiyo ang pitong Senior Citizen, PWD, mga bata at buntis.

Ikinuwento ko ang pangyayari sa aking idolo, sabi nga ni Ate Jean “Anong ginawa ng gwardiya sa tren. Dapat inaayos niya iyon.” Dagdag pa niya dapat pinapatayo ang mga taong di dapat na naroon dahil kung tutuusin dahil kasama lamang sila ng mga taong dapat na naroon ay sapat ng kaalwahan sa kanila iyon. Dapat ang mga Senior Citizen, PWD, mga bata at buntis ang siyang makakuha ng mga pribilehiyong iyon. Kailangan ding maging mahigpit dito ang mga nagpapatupad ng naturang tungkulin upang makatulong talaga sa mga taong ito.